لماذا البلوج؟
لانه وسيلة مريحة للغاية لأرشفة ونشر كل ما يحلو لك كتابته ولك الحرية الكاملة ان تكتب ماتريد...انها جريدتك الخاصة انت الصحفى بها وانت رئيس تحريرها و رئيس مجلس ادارتها بالاضافة الى سهولة التحكم الالكترونية والوسائل الاعلامية المساعدة من صور ومقاطع فيديو...الخ.
لماذا تكتب؟
لطرح الافكار والتفاعل مع الاخرين وتحقيق الاشباع الذاتى من المعرفة ولانها متنفسى الوحيد عن احداث الحياة المتلاحقة والصدمات اليومية وظروف الحياة القاسية....الخ
ده ممكن يكون رد واحد من الطبقة المثقفة فى مصر(ده على اساس ان فى مثقفين بجد فى مصر)....انا بقى من الطبقة غير المثقفة علشان كده الكلام ده كله ميدخلش دماغى او يدخل بس مش باللغة ديه على الاقل....اصلها مش لغتى.
ليه بتعمل بلوج يا مان؟
علشان انا مش عندى ورق وقلم وكمان ايدى بتوجعنى واكيد مش فاضى(باكل-بشرب-بنام-بدخل ال...-وحاجات تانية برده فى ال..)ده غير انى مش بقوم من على الكمبيوتر والنت والورقة والقلم عندى منهم عقدة نفسية(من اثار العدوان التعليمى منذ الصغر)وكمان غاليين.
ليه بتكتب يا معلم هو انت فاضى؟
والله عندك حق يا اسماعيل الواحد مبقاش لاقى وقت حتى يلعب ماتشين فيفا...بس عارف على رأى اخونا المسقف هى منفس...فضفضة ما أنا زهقان وبعدين انت يا سمعة مش مسقف وعارف يعنى ايه كتابة ده غير ان اثار العدوان التعليمى لسه مقصرة معاك جامد....انا عاذراك برده بس انا ححاول معاك...تعالى نبص للموضوع من زمان من قبل مايخترعوا حاجة اسمها قراءة وكتابة...يعنى ايام ما كانت الارض فيها بالكتير 18 واحد عايشين فيها(طبعا الموضوع مغرى جدا لاسماعيل على اساس ان لو 18 بس فى الارض كان ممكن بلاقى شقة ساعتها قانون جديد 70 متر على الاقل ده غير انه حيلاقى شغل و...مش موضوعنا دلوقتى)فوق معايا يا سمعة متسرحش....كان بيحصل ايه ايامها يا معلم؟
كان اللى عارف حاجة بيقولها للتانى كانوا قليلين مش محتاجين كتب وكلام من ده بعدين فضلنا نزيد ولغتك غير لغتى بقى اعمل ايه ؟
اشارات وشوية رسم كده افهمك بيهم شوية شوية صغروا الرسم علشان الكلام كتر شوية شوية بقى رموز وحروف وكلام بيتكتب علشان انقلك اللى انا اعرفه وادونه ويفضل دايما واتطورت العملية لحد دلوقتى....تفهم ايه انت من كل ده؟
تفهم ان الكتاب ده واى كلام مكتوب انسان زيك بس هو مش قدامك...يعنى بيكلمك بطريقة تانية يعنى كتاب الفيزياء بتاعك كان انسان مش واحد بس كذا واحد يعنى(متحاولش تنتقم منه علشان حيتكتروا عليك) واديك فهمت ان فى كتاب رذل زى الفيزياء وكتاب لذيذ زى الاسرار الجنسية لاشهر الفنانات...زى الناس بالضبط يازميل.
عرفت ليه انا بكتب ياسمعة عايز اتكلم يا جدع عايز الناس تقرا كلامى عايز انفس زى الانبوبة اللى قربت تفرقع(كلمة للكاتب..ابقى تعالى تف على قبرى لو كلب قرا اللى انت كتبه)
لو على الكلام موجود نملى بيه 4 بلوجات غير ده بس انا مش فاضى زى مانت عارف علشان كده حنبدأ من دلوقتى والمواضيع حتبقى كلها جديدة واكسكلوسف وعلى نتك يا بلوجر....وافتح يابنى بيبسى للناس اللى بتقرا حلاوة البلوج الجديد(كلمة للكاتب...ابقى تعالى ترتر على قبرى لو حيوان قرا اللى انت كتبه)
ملحوظة:هذا البوست لا يعبر عن ستايل كاتبه فى الحديث بأى شكل من الاشكال انما هو استعارة لستايل الشاب المصرى المطحون السيكا(وللسيكا حديث اخر فيما بعد)
